‘జిల్లా న్యాయ సేవా అధికార సంస్థ ఉద్యోగాలకు 9న రాత పరీక్ష’

​విజయనగరం న్యాయ సేవా అధికార సంస్థ (DLSA)లో ఖాళీగా ఉన్న రికార్డ్ అసిస్టెంట్, డేటా ఎంట్రీ ఆపరేటర్ మరియు ఫ్రంట్ ఆఫీస్ కో-ఆర్డినేటర్ పోస్టుల భర్తీకి ఈ నెల 9వ తేదీన రాత పరీక్షలు నిర్వహించనున్నట్లు ప్రిన్సిపల్ జిల్లా జడ్జి మరియు జిల్లా న్యాయ సేవా అధికార సంస్థ అధ్యక్షులు ఎం. బబిత ఒక ప్రకటనలో తెలిపారు. ఈ పరీక్షలు విజయనగరం కోటలోని మోతీ మహల్, ఎం.ఆర్. కాలేజీ (అటానమస్) వేదికగా జరుగుతాయని పేర్కొన్నారు.​షెడ్యూల్ ప్రకారం.. రికార్డ్ అసిస్టెంట్ పోస్టుకు ఉదయం 10:00 నుండి 11:30 గంటల వరకు, డేటా ఎంట్రీ ఆపరేటర్ పోస్టుకు మధ్యాహ్నం 1:00 నుండి 2:00 గంటల వరకు, మరియు ఫ్రంట్ ఆఫీస్ కో-ఆర్డినేటర్ పోస్టుకు మధ్యాహ్నం 3:00 నుండి సాయంత్రం 4:30 గంటల వరకు పరీక్షలు నిర్వహించబడతాయి. దరఖాస్తుతో పాటు స్టాంపులు అంటించిన కవర్లు పంపిన అభ్యర్థులకు హాల్ టిక్కెట్లను రిజిస్టర్ పోస్ట్ ద్వారా ఇప్పటికే పంపడం జరిగిందని, అవి అందని వారు జిల్లా కోర్టు అధికారిక వెబ్‌సైట్ (https://vizianagaram.dcourts.gov.in) నుండి డౌన్‌లోడ్ చేసుకోవచ్చని సూచించారు. హాల్ టిక్కెట్లపై ఫోటో అటెస్టేషన్ లేని వారు వెంటనే గెజిటెడ్ అధికారితో ధ్రువీకరణ చేయించుకోవాలని, అభ్యర్థులు పరీక్షా సమయానికి కనీసం గంట ముందే కేంద్రానికి చేరుకోవాలని ఈ సందర్భంగా కోరారు.